AGENTSKAP-OOREENKOMS

1.1 In hierdie ooreenkoms, tensy die konteks anders vereis: "FutureSmart" beteken FutureSmart Career Guidance Centre (Edms) Bpk, 'n maatskappy behoorlik geregistreer ingevolge die wette van die Republiek van Suid-Afrika. "Agent" beteken die individu of entiteit wat deur FutureSmart aangestel word om namens FutureSmart op te tree soos omskryf in hierdie ooreenkoms. "Produkte" beteken alle loopbaanleiding-assesseringsprodukte, sagteware, handleidings, vraelyste, verslae en verwante materiaal wat deur FutureSmart ontwikkel en besit word, insluitend maar nie beperk tot die FutureSmart-aanlyn assesseringsplatform nie. "Grondgebied" beteken die geografiese gebied soos ooreengekom tussen die partye, wat Suid-Afrika en/of internasionale gebiede kan insluit soos gespesifiseer in Bylae A. "Opleiding" beteken die formele opleidingsprogram wat deur FutureSmart aangebied word ten einde die Agent te bekwaam om die Produkte te gebruik en te versprei. 1.2 Opskrifte in hierdie ooreenkoms is slegs ter verduideliking en sal nie die uitleg daarvan beïnvloed nie.

2.1 FutureSmart stel hiermee die Agent aan as 'n gemagtigde agent vir die bemarking, verspreiding en ondersteuning van die FutureSmart Produkte binne die ooreengekome Grondgebied, onderworpe aan die bepalings en voorwaardes uiteengesit in hierdie ooreenkoms. 2.2 Die aanstelling van die Agent is nie-eksklusief tensy uitdruklik anders skriftelik ooreengekom deur beide partye. 2.3 Die Agent aanvaar die aanstelling en onderneem om sy/haar pligte en verantwoordelikhede met ywer, integriteit en professionalisme te verrig. 2.4 Die Agent handel as 'n onafhanklike kontrakteur en nie as 'n werknemer, vennoot of verteenwoordiger van FutureSmart nie. Die Agent het geen gesag om FutureSmart in enige kontraktuele verpligting te bind nie, tensy skriftelik gemagtig. 2.5 FutureSmart behou die reg voor om addisionele agente aan te stel binne dieselfde of soortgelyke grondgebiede. 2.6 Die Agent mag onder geen omstandighede sub-agente aanstel nie. Slegs FutureSmart het die gesag om agente aan te stel.

3.1 FutureSmart sal die Agent voorsien van die nodige opleiding met betrekking tot: (a) Die gebruik en administrasie van die FutureSmart-assesseringsplatform; (b) Die interpretasie en aanbieding van assesseringsverslae; (c) Loopbaanleiding-metodologieë en beste praktyke; (d) Kliëntediens en ondersteuningsprosedures. 3.2 Die Agent onderneem om alle opleidingsprogramme suksesvol te voltooi voordat enige Produkte aangebied of versprei word. 3.3 'n Sertifikaat van Bevoegdheid sal aan die Agent uitgestuur word na suksesvolle voltooiing van die opleidingsprogram. 3.4 FutureSmart behou die reg voor om bykomende of herhaalde opleiding te vereis soos nuwe produkte bekendgestel word of wanneer kwaliteitsstandaarde dit vereis.

4.1 Die Agent onderneem om: (a) Die FutureSmart Produkte te bevorder en te bemark op 'n professionele wyse; (b) Kliënte akkurate en eerlike inligting oor die Produkte te verskaf; (c) Alle riglyne, standaarde en beleid van FutureSmart na te kom; (d) Maandelikse verslae aan FutureSmart te voorsien oor aktiwiteite, verkope en kliënte-terugvoer; (e) Die vertroulikheid van alle kliëntedata en eiendom inligting te handhaaf; (f) Geen mededingende produkte te bemark of versprei sonder vooraf skriftelike toestemming van FutureSmart; (g) Alle toepaslike nasionale en internasionale wette en regulasies na te kom. 4.2 Die Agent mag nie die FutureSmart-handelsmerk, logo of enige eiendom materiaal gebruik sonder vooraf skriftelike toestemming nie. 4.3 Die Agent sal onmiddellik FutureSmart in kennis stel van enige klagtes, regsgedinge of regulatoriese ondersoeke wat met die Produkte verband hou.

5.1 FutureSmart onderneem om: (a) Die Agent te voorsien van alle nodige opleidingsmateriaal en ondersteuning; (b) Die Agent te voorsien van bemarkingsmateriaal soos beskikbaar; (c) Toegang tot die FutureSmart-platform en relevante sagteware te verleen; (e) Die Agent in te lig oor nuwe produkte, opdaterings en beleidsveranderinge; (f) Tegniese ondersteuning te verskaf soos redelik nodig. 5.2 FutureSmart behou die reg voor om die Produkte, pryse en dienste te verander sonder vooraf kennisgewing, maar sal die Agent so gou moontlik in kennis stel van wesenlike veranderinge.

6.1 Die Agent is verantwoordelik vir die aanmelding en nakoming van alle toepaslike belastingverpligtinge, insluitend BTW waar van toepassing. 6.2 Die Agent is self verantwoordelik vir die verklaring en betaling van alle belasting verskuldig aan die Suid-Afrikaanse Inkomstediens (SARS), insluitend inkomstebelasting en BTW waar van toepassing. FutureSmart aanvaar geen verantwoordelikheid vir die Agent se belastingverpligtinge nie. 6.3 Agente het die opsies: Opsie 1: Hul eie faktureringsstelsel te gebruik om direkte betalings van kliënte te ontvang. Namens FutureSmart: ______________________ Namens Agent: ______________________ Opsie 2: FutureSmart se faktureringsstelsel te gebruik, waar FutureSmart die kliënt faktureer en betalings ontvang en die Agent se kommissie dan oor te betaal. Namens FutureSmart: ______________________ Namens Agent: ______________________ 6.4 Indien opsie 1 onder 6.3 gekies word sal FutureSmart die Agent faktureer vir die aankoop van aktiveringskodes, soos wedersyds ooreengekom.

7.1 Die Agent erken dat alle inligting met betrekking tot die FutureSmart Produkte, kliëntedata, pryse, bemarkingstrategieë en besigheidsprosesse as streng vertroulik beskou word. 7.2 Die Agent onderneem om geen vertroulike inligting aan enige derde party te openbaar gedurende of na die termyn van hierdie ooreenkoms nie, sonder die uitdruklike skriftelike toestemming van FutureSmart. 7.3 Alle intellektuele eiendom, insluitend maar nie beperk tot handelsmerke, kopiereg, patente, sagteware en assesseringsmateriaal, bly die uitsluitlike eiendom van FutureSmart Career Guidance Centre (Edms) Bpk. 7.4 Die Agent verkry geen regte op die intellektuele eiendom van FutureSmart kragtens hierdie ooreenkoms nie, behalwe die beperkte reg om dit te gebruik soos uitdruklik verleen. 7.5 Hierdie vertroulikheidsverpligting sal voortduur vir 'n tydperk van 3 (drie) jaar na beëindiging van hierdie ooreenkoms.

8.1 Hierdie ooreenkoms tree in werking op die datum van ondertekening en sal van krag bly vir 'n aanvanklike tydperk van 12 (twaalf) maande, waarna dit outomaties van maand tot maand hernuwe word, tensy beëindig deur enige party. 8.2 Enige party kan hierdie ooreenkoms beëindig deur 30 (dertig) dae skriftelike kennisgewing aan die ander party te gee. Die Agent verstaan en stem saam dat geen terugbetalings van aanvangskoste betaal sal word deur FutureSmart. Enige uitstaande kommissie sal wel deur FutureSmart betaal word. 8.3 FutureSmart kan hierdie ooreenkoms onmiddellik beëindig sonder kennisgewing indien die Agent: (a) Enige wesenlike bepaling van hierdie ooreenkoms skend; (b) Enige bedrog of oneerlikheid pleeg; (c) Insolvensie aanvra of gelikwideer word; (d) Die reputasie van FutureSmart skaad. 8.4 By beëindiging moet die Agent onmiddellik alle FutureSmart-eiendom materiaal, sagteware en vertroulike inligting teruggee of vernietig.

9.1 Vir agente wat buite die Republiek van Suid-Afrika werksaam is, geld die volgende bykomende bepalings: 9.2 Die Agent is verantwoordelik vir die nakoming van alle toepaslike wette, regulasies en lisensievereistes in die land(e) waar hulle werksaam is. 9.3 Alle geldelike transaksies sal in Suid-Afrikaanse Rand (ZAR) geskied, tensy skriftelik anders ooreengekom. Wisselkoersrisiko's word deur die Agent gedra. 9.4 Die Agent moet FutureSmart skriftelik in kennis stel van enige land-spesifieke wetlike vereistes wat die verspreiding of gebruik van die Produkte kan beïnvloed. 9.5 FutureSmart behou die reg voor om internasionale agentskappe te hersien of te beëindig sonder bykomende vergoeding indien die operasie wetlik onhaalbaar word.

10.1 Indien enige dispuut ontstaan uit of in verband met hierdie ooreenkoms, sal die partye eers poog om dit in der minne op te los deur direkte onderhandeling. 10.2 Indien die dispuut nie binne 21 (een-en-twintig) dae deur onderhandeling opgelos word nie, sal dit verwys word na 'n onpartydige bemiddelaar wat gesamentlik deur die partye aangestel word. 10.3 Indien bemiddeling ook misluk, sal die dispuut verwys word na arbitrasie ingevolge die reëls van die Arbitrasie Stigting van Suider-Afrika (AFSA). 10.4 Hierdie ooreenkoms word geregeer deur en uitgelegde ooreenkomstig die wette van die Republiek van Suid-Afrika, en die partye onderwerp hulle aan die jurisdiksie van die Suid-Afrikaanse howe.

11.1 Geen terugbetaling sal aan 'n Kliënt gemaak word nie, tensy 'n formele skriftelike versoek per e-pos aan FutureSmart Career Guidance Centre gestuur is na info@futuresmart.co.za. Alle terugbetalingsversoeke is onderhewig aan hersiening en sal uitsluitlik na goeddunke van FutureSmart Career Guidance Centre toegestaan word. 11.2 Indien 'n terugbetaling goedgekeur word, sal dit gelykstaande wees aan 50% van die oorspronklike aankoopprys en sal dit binne 30 (dertig) dae vanaf die datum waarop die terugbetaling formeel goedgekeur is, aan die kliënt terugbetaal word. Geen terugbetaling sal deur FutureSmart gedra word ten opsigte van enige bedrae wat deur die Agent se kliënte geëis word nie — sodanige terugbetalings sal uitsluitlik deur die Agent self verhaal word.

12.1 Hierdie ooreenkoms, saam met die Bylaes, verteenwoordig die volledige ooreenkoms tussen die partye met betrekking tot die onderwerp hiervan en vervang alle vorige onderhandelinge, ooreenkomste of verstandhoudings. 12.2 Geen wysiging van hierdie ooreenkoms sal geldig wees tensy dit skriftelik gedoen en deur beide partye onderteken word. 12.3 Die versuim van enige party om enige reg kragtens hierdie ooreenkoms af te dwing, sal nie as 'n afstanddoening van sodanige reg beskou word nie. 12.4 Indien enige bepaling van hierdie ooreenkoms ongeldig of onafdwingbaar bevind word, sal die oorblywende bepalings steeds van krag bly. 12.5 Enige kennisgewing ingevolge hierdie ooreenkoms moet skriftelik wees en per aangetekende pos, e-pos of persoonlike aflewering gestuur word. 12.6 Die Agent mag nie sy/haar regte of verpligtinge kragtens hierdie ooreenkoms sonder die vooraf skriftelike toestemming van FutureSmart oordra nie.